政府修訂《公司條例》限制傳媒查閱公司董事資料，即時俾人鬧係為免一眾權貴被「起底」，更惹起傳媒強烈反彈。政府近日知衰，開始放風話萬事有商量，「名義上」叫做代表傳媒嘅立法會體育、演藝、文化及出版界議員馬逢國就建議，不如每位公司董事，都可以查番邊個人起過佢哋底、查過佢哋嘅資料喎。
呢個「反查冊」嘅建議好出位，但馬逢國就沾沾自喜覺得呢個建議唔錯，佢話既然傳媒有權查冊起底，點解被查冊嘅人，冇權知道邊個查過佢哋資料先？佢仲話咁先叫「公平」喎！至於傳媒代表有冇搵過「業界代表」馬逢國反映對《公司條例》嘅不滿呢？馬逢國話冇，因為傳媒覺得自己做單新聞，效果仲好過搵佢反映。