耀才（1428）剛發盈喜，主席葉茂林明顯心情大好，喺上周六公司周年晚宴上，私人向員工豪派450萬，包括市值419萬嘅耀才股份，同埋總值30萬獎金獎品，最好遲啲派股息畀股東一樣咁豪啦。
郭思治分到股份
當晚約有三十位員工分到耀才股份，包括大隻佬股評人郭思治同CEO陳啟峰等十位被指為「耀才之寶」嘅高層，以及一班老臣子同各部門表現突出嘅員工。
分唔到股嘅員工都冇失望，事關到場嘅員工，每位有五百元大利是，抽獎環節包括十部新款蘋果產品同一堆現金獎，最大份嘅現金獎有2,500蚊，贏到歌唱比賽仲有額外一萬蚊。
舊年間間證券行叫晒救命，耀才都可以發盈喜，今年股市旺番晒，每日平均成交七百億樓上，如果情況持續，耀才一班員工明年應該更高興。