近日是非多多嘅鄧紫棋（G.E.M.），早排俾前輩甄妮批評冇禮貌，搞到佢成為新聞人物，好在是非冇影響佢嘅人氣，佢最近仲第三度獲得化妝品品牌邀請合作，日前佢一洗以前嘅男仔頭形象，喺廣告中搖身一變成為性感女郎。
「以前全身脂肪」
G.E.M.早前着上露膊裝拍廣告，比以往性感同成熟好多，加上baby fat大減，即刻增添咗女人味，佢話𠵱家為4月個唱積極減肥，但就搞到上圍縮水，佢話：「減肥減咗好多，以前全身脂肪。上圍都唔係差太遠，係差咗一cup啫，比例唔會太遠。但係我細細粒，都足夠啦。」
今次個唱入面，會走成熟女人路線，問男朋友林宥嘉鍾唔鍾意時，佢話：「唔知呀，同事就話靚，佢哋鍾意我瘦啲，總之身邊所有人都鍾意我健康。」
不過最令G.E.M.開心嘅，係同化妝品公司合作咁多年，每次酬勞都有上升。不過林宥嘉就無緣成為第一個欣賞佢靚相嘅人，經理人就率先睇佢嘅廣告相，仲要得經理人過目批准，冇走光先可以出街。
撰文：馮仁昭
