傳統上有所謂1月效應──1月升市，預示全年造好。雖然唔係百分百準確，但起碼舊年靈驗（1月升1956點，全年升4222點），希望今年可以冧莊。年近歲晚，團年開年飯排山倒海，做食肆肯定最開心，唐牛噚日打去酒樓訂枱，服務員話已經爆得七七八八，手快有手慢冇。主打中式餐飲嘅稻香控股（573），旗下食肆品牌眾多，包括稻香、潮樓、客家好棧等，名副其實梗有一間喺左近，炒新年概念股要預埋佢。
稻香中期盈利1.4億銀，按年增長10.8%，年度化市盈率17.1倍，平過同業大家樂（341）及大快活（052）平均嘅23.4倍近三成。集團擁有多個物流中心及禽畜養殖場，食材控制更具效率；旗下泰昌餅家除咗蛋撻馳名，仲做埋手信生意，盡吸過年送禮及自由行客。
稻香早前創4.94元新高後反覆回落，似在消化獲利盤，上周五收報4.67元，戰友可候前橫行區4.50元水平吸納，目標再破頂，潛在升幅起碼一成。
唐牛