桌球繼續做「精英」

桌球繼續做「精英」

恭喜恭喜!除咗Marco越打越勁外,香港桌球都有好消息,近年一直困擾球手嘅「去留問題」終獲解決,桌球繼續成為體院「精英項目」,體院本周三將接見已受精英資助嘅桌球代表,希望佢哋繼續為港爭光!

其實有𠵱個困擾,全因為明年仁川亞運會刪除咗桌球項目,於是打從2010年廣州亞運會後,就一直盛傳桌球被擯出體院「精英項目」,搞到一班一直爭取好成績(1998年曼谷亞運至今4屆亞運共累積4金3銀3銅)嘅選手食唔安瞓唔落,當然都包括Marco、兩屆女子世錦賽冠軍吳安儀及佢嘅隊友葉蘊妍,各人成績咁好,都仲話要被踢出局,唔係啩?

好彩體院臨崖勒馬,因為真係影響好大,家陣有成27個桌球手攞緊體院「精英資助」,A級資助都有6個,包括Marco、馮國威、吳安儀、葉蘊妍、蘇文欣同余晶晶,除咗錢嘅資助外,體院嘅「一條龍」服務仲包括教練、體能同科研,都係好重要;𠵱家桌球有得留低,可能連總教練W基夫斯都唔使失業囉!