恒隆地產(101)董事總經理陳南祿準備買新馬仔!祿哥另一個身份係馬會大董,有馬跑嘅日子,好容易喺馬場碰見佢。早排聽佢講,佢隻「時時有機」應該跑埋今季就會退役,佢打算買番隻新馬,雖然未落實買邊隻馬,但佢已經度緊個馬名。
只拉過三次頭馬
唔怕得罪講句,祿哥嘅馬主運睇來麻麻哋,第一匹馬「有機可乘」一場賽事都未跑過,就因為健康問題而提早退役。𠵱家跑緊呢隻「時時有機」,08年第一次出賽就贏出,可惜之後表現一般,至今只係拉過三次頭馬,舊年至今未贏過,最叻都係跑第二,所以話呢隻馬跑埋今季退役真係唔多出奇。
祿哥講,佢嚟緊都打算喺南半球搵馬,咁即係唔係澳洲就係紐西蘭,睇番資料,「時時有機」同「有機可乘」都係來自紐西蘭。佢唔打算親自去揀馬,諗住將呢個重任交畀練馬師,指練馬師知道佢嘅心水同喜好喎。
雖然未必親自揀馬,但馬名點都要自己度。祿哥之前喺國泰航空(293)返工,諗親馬名都同飛機有關,𠵱家轉行做地產,馬名應該有番個「地」、「產」、「樓」字先似樣啩,有人提議佢用「遍地商機」,咁就有「地」又有「機」。
其實使乜煩,一於叫隻新馬做「賣得晒」啦,佢老闆陳啟宗上星期先至講,恒隆揸住1400個單位,並非唔想賣,而係賣唔出,一諗住拎幾百個出來賣就遇上歐債危機或者係政府出招。為老闆着想,一於諗諗佢,「有樓可買」、「賣得出」都幾好吖。
李華華
mailto:[email protected]