內地自由行「侵佔」港九新界，拖住個篋嘅威力勁過坦克。自由行點影響小市民生活毋須多講，就算連香港本土富貴一族都不能倖免。屬於富豪級數嘅自由黨立法會議員田北俊，話晒都係堂堂地產商，想買件靚衫，都俾強國人搶晒，問你怕未！
范國威俾篋神打尖
田少噚日出席城市論壇，話雖然自由行造就咗龐大經濟效益畀香港，但係就衍生好多問題，佢自己一樣都遭殃，有次想買件意大利名牌子嘅貴價褸，結果俾自由行搶到斷晒貨買唔到。此言一出，在場個個蟻民都嘩嘩聲。
唔夠強國人搶嘅，又點止田少呢。啱啱成立「香港本土」嘅公民黨毛孟靜都話，曾經喺MaxMara試過一套套裝，試完衫出嚟照鏡，點知有個自由行指住佢件衫，同個售貨員講話要一套一模一樣嘅。毛孟靜見狀即時跳番入更衣室，換衫走人，拒絕同自由行同一品味。
佢老友新民主同盟范國威就試過一家三口去迪士尼，連續三次俾「篋神」打尖，嬲到佢老婆上前理論，擊退「篋神」。
避開自由行仲有公民黨陳淑莊。Tanya話平日已避得就避，避到去金鐘PP戲院睇《我的機械人老友》早場，點知兩位自由行一男一女一路睇戲，一路用普通話高談闊論，唔少觀眾「o殊」佢哋，點知呢兩位強國人繼續高聲談論，搞到Tanya非常冇癮。
mailto:[email protected]