1992年10月5日，清晨時分，將軍澳發生了一宗嚴重交通意外，一死一重傷。
二人女子組合Face to Face成員吳少芳（Jodi）乘坐經理人駕駛的私家車返寓所途中，跟一輛泥頭車迎頭相撞，經理人送院後證實不治，Jodi四肢癱瘓。
Face to Face退隱20年，為了全癱病人籌款，終於在《慈善星輝仁濟夜》站起來。再次合體，場面感人，台上的Jodi和拍檔蔡惠玲（Connie）手拖手，面對面，唱着首本名曲《情迷Milano》和《一些》，勾起了我們的集體回憶，與此同時，四肢癱瘓的Jodi更希望坐在輪椅上的她，可以提醒香港人，其實我們已經擁有很多。
撰文：楊潔雯
相信沒有人可以比Face to Face的吳少芳更有資格審視人生！她，死裏逃生，由深切治療轉去創傷病房，之後入住療養院，經過一年零八個月的治療。本來無神論的Jodi，在病榻的時候，是滿天神佛，她笑着說：「瞓病床嗰時乜都接收，有神父幫我洗禮，有聖水，十字架仲有符，真係乜都有，但係𠵱家我會信輪迴報應多啲。」 Jodi求神拜佛，只求一線生機。
一個不能磨滅的烙印，間中會隱隱作痛，不過Jodi早已習慣，痛楚甚至成為終身摯友，她淡淡地說：「意外時，我係瞓着咗，醒番就喺醫院，初初只係識得辛苦，早期喺生理上，因為全身插晒嘢，冇晒感覺，成日做唔同治療，嗰時唔識唞氣就喺個頸度挖一個窿，塞條喉入去搵部機幫我唞氣，條喉好似十日定兩個禮拜換一次，每次換都好痛苦，因為嗰度係永遠都未埋口，嗰啲肉俾條喉塞入去係『bup』一聲，再攞出嚟跟住又夾硬塞番入個窿度，好恐怖囉！噴晒血㗎！噴到醫生一面血咁，同埋唔郁得又講唔到嘢，因為插咗氣喉，發唔到聲，嗰時唔知點解感覺會喺晒塊面度。」
尋名醫遇神棍
經過Jodi繪影繪聲的描述，痛楚歷歷在目，她卻處之泰然說：「𠵱家全身都有感覺，手指骨會痛，因為郁唔到，嗰啲關節係痛，不過唔係痛風，係麻痹，感覺係好唔清醒，而呢個感覺，我已同佢做咗朋友，我好習慣佢，係習慣到唔記得咗佢。」
Jodi比想像中強悍勇敢，她不怕苦、不怕痛，更不怕舊事重提，但她最怕的竟然是親人，父母和五兄弟姊妹的保護和關心，成為Jodi的負擔。勇悍的生命戰士，提到無私奉獻的家人終於決堤，在旁細聽的Connie急為好友抹鼻拭淚，Jodi說：「返到屋企好多個位覺得好慘，我記得喺療養院七個月，有一日個治療師拎咗份嘢畀我，佢話『吳少芳呢啲係輪椅catalogs，你要揀一張輪椅，你第日返屋企要用！』我望住叠嘢係咁喊，係有少少唔能夠接受，呢樣嘢我冇同院友及屋企人講，諗咗兩三日諗通咗，條路就係咁，呢條路係一定要行，之後返屋企，屋企人喺大陸搵氣功師，經絡醫師，浸手浸腳，又拍又打又熏藥醫我，上去128磅，落嚟得番105磅，瘦到我唔敢着短袖衫，返到香港又有神醫針灸，仲遇到一個神棍，搵唔知乜嘢整我頸骨同頸脊，最後賺咗個水泡，之後唔再做喇！全家人想買個希望，到頭來令大家失望，我唔想令佢哋傷心。」
籲港人勿埋怨
殘而不廢，為強烈表達這個訊息，意外後第六年，她不理家人反對搬出來住，Jodi眼神堅定說：「我出院返屋企，有段時間個心入面成日講『你哋唔知我要乜？』我屋企人對我好好，周圍訪尋醫生，好保護我，但其實我唔係要呢啲，我要自立，唔要成為負累，所以唔理佢哋反對，帶住個工人搬入新界，離佢哋遠啲！」想起一班要父母供養照顧的「啃老族」，眼前的Jodi頭頂多了一個光環。
眼見不少四肢健全的年輕人，常無病呻吟，只懂得叫罵，Jodi的故事發人深省，她有感而發說：「𠵱家嘅人好鍾意埋怨，好多戾氣，其實大家唔係咁慘，係諗嘢太負面，或者放大自己失去嘅嘢，擁有嘅就睇得唔太清楚。人生本來就有高低，唔可能一條線上，好多人失敗過，失敗咪再嚟過囉！」Jodi放下身段，鼓起勇氣站台，只希望傳遞正面和積極的訊息：「有人覺得我好慘，但係我只想話畀錫我嘅人聽，其實我OK㗎！I'm fine，就好似最近我作嗰首歌《Why me》咁，唔需要傷心，睇我哋表演好感動、好激動，希望大家開心之餘，唔係皺住眉咁，流眼淚係開心嗰種，我唔想令人傷心。」