未到重九，麗展（488）系股價鬥快登高，剩底大落後豐德麗（571），買。麗展由上年中發力，到家陣升咗兩倍，麗國（191）對上星期五搶升15%，同樣創咗三年新高，累積升幅兩倍過外。豐德麗點？佢三年高位喺2011年6月3.34元，跟住過去兩年，一路兜大圓底，兜到家陣，現價得1.69元，等緊爆，要追落後，真係大把空間。再講，豐德麗NAV 6.4元，現價係大大大折讓74%，兼係系內折讓最大。而嚟緊日子，集團又直接受惠旗下麗豐（1125）之內房及橫琴增值，NAV可以快高長大。再講，豐德麗淨現金高達6億銀，又係現金牛，冇有怕。呢轉買豐德麗，上番2011年高位3.34元咁計數，現價幾乎要翻一番，未計增值前，折讓仍然挨近50%。
時富金融宜短打
時富金融（510）上個月初晉身毫子股後，好有秩序咁整固。呢期證券股有勢狂飆，多得阿爺持續推進金融及證券政策。而嚟緊日子，祖國只會有越嚟越多有利政策推出，呢類唔獲市場中人睇好嘅股份，又有新story炒。Before that，趁呢轉調整期短打時富金融，博升20%到0.128元，未有耐上到NAV 0.26元。
錢雋