路過石屎球場，平日就算眼見好波之人都未必會停留半步，但那天下午卻駐足觀賞了好一陣子，還忍不住偷拍了幾張那位媽媽與囝囝波來波往的溫馨。
那位囝囝大概7至8歲吧，負責守龍，媽媽則一副準備去街市的模樣，揹着手袋將那個小小的膠波仔踢畀阿仔，不過年紀細細的阿仔仲滑稽，又仆又碌的才追到個波，實在好合理，若果阿仔已經好好波的話，會叫阿媽同佢踢波就奇。
小朋友要出汗，家長（包括我）帶住佢哋去到公園/運動場/XX樂園就已經叫交了差，你自己去癲啦，偶爾見到一兩個家長唔小心陪埋個仔入去大型波波池，通常都係入咗去就唔郁瞓咗喺地阻住地球轉，所以更佩服呢位落場踢埋一份嘅媽媽，喺佢眼中同囝囝的球來球往，其實唔係叫踢波，係親子。親子係有期限嘅，到阿仔好波之後嫌棄阿媽為止。
農曆新年煙花匯演的特別安排，據說會有PSY嘅〈江南style〉，橋就唔新，不過畢竟都新過年年播埋〈歡樂年年〉那堆罐頭，到時維港兩岸會唔會有好多市民忍唔住聞歌起舞？10歲以上應該唔會，但乳臭未乾的小朋友就分分鐘做得出，真性情呢味嘢，大人們遺忘咗好耐啦，然後最近見到有位香港大學生，為〈江南style〉賦予全新定義，都係嗰首歌，嗰啲舞步，嗰啲場景，但係呢個港產MV嘅主角，全部係唐氏症候群嘅小朋友，見到佢哋好努力的去演譯，確實令人動容，感染力隨時勁過原唱。娛樂無界限，你玩得我亦玩得，不要為少數分子設限，亦唔好限制咗你自己嘅視野，呢個MV嘅意義不止得啖笑，難怪有留言話係佢最欣賞嘅版本。
同一件事可以有不同意義，碧咸就以身作則話畀你知係乜意義，1月份嘅轉會係經理人幫球員搵大錢嘅時候，玩家就乘機搞十單八單轉會圖利，碧咸呢就調轉嚟，唔搵錢仲捐錢㖭，係因為佢已經搵夠、定係佢心諗小財唔出大財唔入都好，呢次佢可以攞番嘅延後利益恐怕數唔晒。由今日開始，碧咸已經唔再係足球員，而係大慈善家。不過我細細個睇捐款節目，最有心做善事嘅，永遠係嗰位叫無名氏嘅仁兄。
keyman
now TV主持
mailto:[email protected]