轉瞬間，郭羨妮的小公主已經八個月大，Sonija不時在微博晒幸福，將可愛又精緻的Kylie公主成長過程跟大家分享，一提到家中的小公主，Sonija笑不攏嘴，她說：「我喺屋企叫個女做家豬，哈哈！即係屋企隻豬，我老公錫到佢燶㗎！佢一返嚟香港就睇女，佢喺度，係佢湊，我唔理㗎！」Sonija女王沾沾自喜，不經意再一次稱讚她的「木頭」丈夫說：「佢OK㗎！我哋湊，佢見到，再教吓佢，做完一次咪識囉！」相夫教女，果然頭頭是道！
絕非怪獸家長
Kylie繼承了媽媽郭羨妮的優良血統，靚媽卻堅拒讓愛女繼承衣缽，Sonija說：「我梗係唔想佢入呢行，呢條路太難行，係運氣加實力，好難突圍而出，我寧願佢正正常常，做啲正常嘢，我好想佢開心，佢鍾意學乜就學乜，我絕對唔係嗰啲怪獸家長。」
言猶在耳，靚媽的少少虛榮心又忽然作怪，Sonija自顧自說：「但係我好想佢做醫生，我覺得佢好大膽，好男仔頭，我會引導佢去做醫生，哈哈！呢個好似係一個條件，做醫生係一個非常好嘅職業，我成日都話好想佢做醫生，我都有去睇幾多歲可以玩medical嗰啲嘢，不過冇咁快，哈哈！要成七、八歲先識。」望女成龍，人皆有之，怪獸一下又何妨！