據非正式統計，香港上一代富豪學歷只有小學程度的比例甚高，雖然今天香港已是遍地大學生，同樣小學未畢業、打拼大半生創立自己鐘錶王國的「國產錶王」董觀明，卻說香港已今非昔比。他坦言，過去香港這個城市曾經充滿機會，但時至今日「呢一代人已經冇乜發展空間，如果要我𠵱家再嚟一次（創業），我諗我都未必搞得掂。」 記者：鄧偉忠
翻開董觀明的履歷，他小學二年級便輟學，14歲已開始到社會工作，第一份工是在一間米舖打雜，沖茶、倒水、洗地一腳踢，每日由早上七點做到凌晨兩點；八年後他跑到一間出入口公司轉做辦公室助理，兩年後因為老闆移民，再轉到一間錶帶廠做Sales（銷售員），每份工的工作量均有多冇少。
88年北上創手錶品牌
度過10多年打工仔生涯，直到1980年董觀明毅然自立門戶，創立自己的錶帶貿易公司。照片中年輕的董觀明黝黑瘦削，他笑言前半生創業很辛苦，「冇本錢請人，頭兩年基本上係自己一腳踢，每日都托幾箱錶帶周圍跑。」不過憑着勤力加上在錶帶廠工作時累積下的人脈，10多間廠家均向他供貨，當年基本上不愁沒有生意，也成就了他的第一桶金。
董觀明在1988年到內地開拓自己的品牌鐘錶生意，他說，那時候最能領會「先做人，後做事」的道理，因為要為自己的品牌鐘錶爭取在店舖裏最好的櫃枱，必須懂得「做人」。
辦公室點滴
他說：「賣錶最重要係你擺個位置，喺大陸做生意好講關係，要一個好位置就要建立關係，要建立關係一定要飲酒，一支白酒加一支五糧液係基本，如果唔飲醉，佢哋會覺得你唔當佢係朋友。」
他坦言，試過中午12點已經飲醉，也試過飲醉後在船上嘔吐大作的滋味，但「做人」的意思除了是懂得交際，也包括做好本份，凡事親力親為，「自己打返嚟嘅關係先係自己嘅。」
籲青年「先做人後做事」
回顧過去，董觀明認為創業路雖然艱辛，但付出總算得到回報，然而到了今天情況已經完全不同，「個社會係咁，上一代嘅人都已經插晒旗，你𠵱家仲邊度有位可以揳入去？好似我喺大陸好辛苦攞咗好多靚櫃位返嚟賣錶，今日換咗另一個人，就算比我更辛苦都未必可以攞到。」
今日社會局面已不可改變，董觀明對年輕人送上的還是他那句「先做人，後做事」。
他認為，做事要盡量做到不會假手於人，還有就是「早着先機」，「有時啲機會係睇到㗎，好似以前香港錶帶生意好好，所以好多老前輩只係取易不取難，唔想返大陸做品牌錶生意，結果就失咗先機。」
董觀明簡歷
•現年61歲
•時計寶（2033）主席兼行政總裁
•被譽為「國產錶王」
•湖南省政協委員
•2005年獲中國鐘錶高峰論壇頒發「十大風雲人物獎」
•座右銘：「先做人，後做事」
董觀明鐘錶業之路
1980：成立偉明五金（即時計寶前身），在香港分銷手錶錶芯
1988：在內地成立天王電子有限公司
1988：自創鐘錶品牌「天王表」
2002：推出瑞士製造的「拜戈錶」
2004：「天王表」被評為中國10大國產手錶品牌之一
2005：偉明五金透過借殼形式在新加坡上市，易名時計寶（新加坡）
2011：據Euromonitor統計，「天王表」以11.1%市佔率成為國產錶銷售首位
2011：時計寶（新加坡）被私有化，從新交所退市
2013：重組時計寶在香港上市