北韓射手鄭大世早前由科隆加盟韓職水原藍翼，呢單轉會喺南韓都幾轟動。日前呢支南韓勁旅就因為唔想鄭大世佔用一個外援名額去踢亞冠盃，索性叫佢用南韓球員身份出戰；事關鄭大世嘅特殊背景，本身就擁有南北韓兩個國籍嘅護照，而據聞呢名綽號「北韓朗尼」嘅箭頭亦已經答應咗。係人都知南北韓關係極差，鄭大世咁搞法，真係隨時招致死亡威脅喎。