總會在夜深的砵蘭街找到岑蘊華，五年前他開設咖啡店「TC2 Cafe-Workshop」，至今成為重要文化平台，惟業主決定加租九成，事件曝光，藝文界及新聞界群起拉隊光顧，可他心裏有數，「唔係粵語長片，你突然有病，爭十萬就可以醫番好。」
文：蔡俊業 攝影：伍慶泉
地產霸權摧毀心血
自上月初面書專頁「場邊故事」一篇關於此店遭加租的報道瘋傳後，「TC2 Cafe-Workshop」晚飯時段連續數天爆滿，很多都是熟客，岑蘊華笑言：「有種『我幫襯你，你攞錢去交租喇』嘅感覺。又好似瞻仰遺容，嚟睇你死未。有人講笑話，好好啦，九成啫，唔係三倍。」岑蘊華非常理解這心態：「因為大部份人都無切膚之痛，亦無能力改變，作為旁觀者就只能夠當剝花生咁睇，或者講句笑，同情你。」
同情與說笑，不能當錢花，朋友多光顧亦不過杯水車薪，面對逆境，他只好跟業主還價、物色新舖位：「我無嬲，係氣餒，我由零開始，由最初開舖無客，我同表妹坐門口張枱扮客，到年半後開始有穩定熟客，到第三年唔使蝕，呢兩年更多人識，有埋包場，生意終於穩定到唔使太過憂慮，但你加九成租，一下就摧毀我幾年建立嘅嘢。」他開始對「地產霸權」四個大字有更深體會──在香港經營小本生意的成敗關鍵，非關創業者的個人能力，而是業主的商業決定，租戶議價能力低，又無後路。「做得好，唔足以令我生存同賺錢，業主一個決定，加你五六成租就可以捽死我。以前未做生意，見有啲食肆好旺都做唔住， 𠵱家我傾向相信，好多食肆都係因為加租而做唔到落去。」
脫離供求定律
岑蘊華分析，現在整個地產市道根本靠訊息作為炒賣本錢，完全違反經濟學的供求定律，他遙望一街之隔的新開張皮行，「唔熟地產嘅人會諗，大家都唔租，吉咗佢，個價遲早會跌番落嚟，但我見到嘅係，皮行未開張前個舖位空置咗足足一年，我假設嗌價四五萬，一年講緊五六十萬，但業主就係夠膽死空置一年，因為最終實有人用更高價租舖，到時一鋪返晒嚟。」說穿，就是香港人根深柢固的賺到盡心態，「香港人價值觀係賺到盡先叫叻，賺到最合理回報先最醒，可能收六萬租已經係業主計算之內嘅回報，但當有人話畀業主知所有舖頭都值十萬，業主仲會開價六萬？唔係咁儍仔吖嘛？」
業主不想當儍仔，結果令地產市場的叫價和運作完全發瘋，他就親身見證過一件實例，「新蒲崗有間舖做車仔麵，業主加租加到個租客走為止，三萬你得唔得？得，咁四萬啦，你走唔走？」又如剛結業的銅鑼灣「利苑粥品專家」，負責人郭先生指雖然租金一下子由每月三十萬加到六十萬，但業主已算有良心，因為鄰舖「莎莎」租金已達九十五萬。是故，岑蘊華從不覺得「TC2 Cafe-Workshop」加租九成有甚麼值得報道：「香港有好多舖頭，死咗都無人知！」事件在「場邊故事」曝光，亦不過事有湊巧，「因為表妹啲師姐喺嗰度做，提起過呢件事，覺得太誇張，就做咗個訪問。」往後，他幾乎婉拒所有訪問，既因為新租約尚在商討階段，他不希望業主覺得他們借媒體報道施壓，其次遭加租兩三倍的大有人在，「我唔係唯一例子，如果要鬧地產霸權，我又唔覺得我呢個Case好特別，只不過我係傳媒人背景，先多人關心。」
Art is everywhere
岑蘊華1991年中大新聞系畢業，先後在商台、有線跑了四年多港聞，1997年經引薦加入無綫新聞及公共事務部，同事包括區家麟，他曾當《九七透視》編輯，採訪過香港回歸及台灣九二一大地震等重要新聞事件，2004年出任《星期X檔案》首席編輯，然而事業再順利，依然躲不過樽頸問題。「當時我已經做咗記者十二年，去到一個位，覺得自己進步唔大，我諗好多人都會遇到呢個情況，過到嘅，會豁然開朗，但我就係喺呢個樽頸位想做其他嘢，咁啱喺呢段時間出現咗表妹呢個人。」
表妹叫吳婉君，是他在有線新聞的舊同事，那時雙方也在事業樽頸位，又恰巧有位原本當剪片的舊同事在柴灣經營小型飲品店，激起他們轉戰商場的念頭。「我哋去幫襯，試吓沖咖啡，覺得幾好玩，表妹就提議話不如一齊搞生意，我唔熟餐飲業，有個Partner都好緊要，心諗，應該唔係好難啩。」那時香港剛經歷沙士蹂躪，舖租狂瀉，注定是合適時機，覷準同區沒競爭，首先落戶新蒲崗，做早餐、午市及下午茶生意，小試牛刀，四年後在油麻地現址開分店，地舖連閣樓的實用面積是舊店四倍，地方闊落了，賺錢能力大增，但他倆都不擅做精緻餐飲，要經營咖啡店，就要從市場定位着手，坊間主打電影及相片主題的咖啡店太多，也太專，他倆又不懂舞蹈和音樂，「所以就定義得闊啲，主題係文化平台。」但座落砵蘭街對正夜總會，附近更有不少流鶯在街上流連，不怕怪相？「文化唔應該有界線，唔應該局限喺中環或者Art Centre，Art is everywhere，點解喺砵蘭街搞文化就一定死硬？油麻地有電影中心、油麻地戲院、果欄、老舖，全部都好Local，好有文化涵養。」經營方法是大開中門，歡迎各路英雄過來搞展覽及工作坊，「基本上搞所有展覽都唔收錢！」又曾舉辦過文化沙龍，主題包括汶川大地震的採訪分享及新聞道德，亦曾與記協合作，邀請練乙錚做主講嘉賓，「總之係我提供地方畀你，你覺得可以用就用。」
文化創作應該有價
五年過來，店內的文化氣息逐漸成形，岑蘊華直言，這些年遇過的一些人與事，令他搞文化平台的意志更堅決。
話說某天，一位名為點心的少女入店，問他可否寄買她自資出版的繪本《一蚊雞》，「我問本書係包住定可以俾人揭開睇，佢話可以揭，我話：『咁無人買㗎喎，你又唔係幾米，好難賣。』但佢話：『唔緊要呀，老闆，我覺得有人睇我嘅創作，已經贏咗。』我當下好感動，因為喺香港做自資出版無乜出路，佢精神可嘉。」後來有記者在店舖見到此書，結果在其雜誌寫了一篇書本推介；另一個故事，話說某少男說好會和一位泰國藝術家在咖啡店搞展覽，後來計劃胎死腹中，但因已預留場地，少男自動請纓邀請之前曾參與畫班的同學一齊搞畫展，原來很多人早已放棄畫畫，因為這展覽而重新執筆，其中一幅畫，畫了幾隻貓在望星空，有位食客留意到，打算收藏，畫者開價$1,400，食客打退堂鼓，「我心諗點解開呢個價，三嚿水都得喇，但畫者就話：『老闆，唔係咁計，我每日放工都九點十點，每晚畫兩個鐘，畫咗一個禮拜，計番時薪都係一百蚊一粒鐘。』呢件事啟發到我一樣嘢，但凡創作都有佢嘅價值，要嘅既係別人欣賞，亦需要錢。就係因為呢啲小故事，我先知道原來開放文化平台呢個諗法係咁有意義。」
建立文化平台，有如種樹，人是土壤，地方是根，時間是種子；不能否認，這咖啡店已成為本地藝文界及傳媒界一個重要地盤，岑蘊華希望自己和拍檔可以再做多一點點，推動文化，「講真我覺得好慚愧，號稱文化Cafe，但其實唔係做到好多嘢，呢三四年只係搞過四五場Music show、十幾場展覽、兩三次沙龍，唔算特別文化。」說着說着，又回到話題原點，咖啡店租約於三月底屆滿，是繼續建立，還是拆掉重來，農曆年前後自有分曉，但願吉星高照，有奇蹟發生。
新年人日TC2人物採訪工作坊
講者：陳曉蕾
日期及時間：2月16日3:00pm至5:30pm
費用：每位$100包簡單飲品
名額：50
查詢：2388 9772
地址：油麻地砵蘭街106號地舖及閣樓