無論是《五福星》系列的犀牛皮、《精裝追女仔》系列的劉定堅，或是《最佳損友》系列的牛精帆，馮淬帆的電影成為不少香港人的集體回憶。有份演今年賀歲片《2013我愛HK恭囍發財》的他做過導演、編劇和演員，見證娛樂圈起與跌，最後竟然被「實Q」考起：「點會估到security會用中文嘅實字同英文嘅Q字寫出嚟，我真係唔係香港人。」他更直言不習慣日踩夜踩的製作，又嫌香港食飯貴，不考慮回流拍劇。
撰文：何慧斯
因為政治因素馮淬帆移居台灣，以為他退隱歸田，但事實工作未間斷過，他說：「唔係好忙，但係冇間斷過，唔係我食乜呀？我喺內地一路都有拍，拍咗一個系列嘅電影。𠵱家仲有人分中港台，我真係好反對，喺邊度住同去邊度拍戲係完全冇關，你睇吓荷李活嗰啲人，唔通拍親戲都喺洛杉磯呀？咪又係一拍戲就攞個皮篋走！」
這個遊歷四海的中國人，近年在好友曾志偉誠邀下，連續三年參與賀歲電影《我愛HK》系列演出，莫非有鋪拍賀歲片癮？今年在《2013我愛HK恭囍發財》飾演酒樓老闆的馮淬帆說：「唔係為過癮，係為搵食，舊年嗰套係少人，今年人最多，導演同編劇話今年最好，但係我就唔覺，因為我今年戲份唔多，最多係黃宗澤，阿倫只係得一場，葉玉卿撞唔到。」
食在香港乜都貴
問馮淬帆覺得新一代的演員表現如何？他說：「老實講，我冇乜感覺，咪OK囉，因為文化唔同，我冇香港文化，最舒服係喺台灣。我唔識睇𠵱家啲劇本，真係唔識睇啲廣東話，以前我喺香港寫劇本都係寫語體文，唔識用廣東話寫，啲人話唔明我寫嗰啲語體文，我咪話你中學有冇讀過國文呀？」
這個不協調曾經鬧出笑話，馮淬帆說：「我舊年睇劇本，睇咗好耐真係唔知乜嘢係『實Q』，點會估到security會用中文嘅實字同英文嘅Q字寫出嚟，所以話我真係唔係香港人，呢啲你實考起我。」結果怎樣？他沒好氣地說：「最後咪問人『實Q』係乜鬼嘢嚟㗎？我仲諗起以前喺TVB，試過睇劇本見到有人畫公仔，佢寫唔到嗰個中文字出嚟，呢啲咪仆街啦，我哋係中國人，拍緊中國人嘅戲，點會喺劇本寫英文畫公仔，呢樣我唔怕得罪人，你點樣做編劇呀？你問勻全世界都冇可能，唔識中文字就寫個英文字母譯個拼音出嚟。」
結果馮淬帆選擇只有拍戲才回來香港，他坦言：「我呢次喺呢度開工，起碼有11、12日休息，每次出去搵飯食真係辛苦，好多嘢都唔啱食，就算搵到好嘢，又得一個人。我試過一個人去食個set dinner，用咗460幾蚊港紙。」說得興起他隨手拿出銀包，掏出一叠成吋厚的信用卡收據，連珠炮發說：「唔係身份嘅問題，我唔去得茶餐廳，嗰啲文化見到就憎，呢叠單我返台灣埋單，淨係食都用咗3萬幾新台幣，食飯貴到呀，真係唔知點解咁貴，星期五、六仲係坐滿人，冇位坐㗎，我喺台灣食番類似嘅嘢，都係800蚊新台幣，香港食飯真係貴。」
踩無綫一成不變
坊間曾盛傳無綫有意找馮淬帆拍劇，若然成事，相信他首要解決飲食問題，誰知他說：「冇喎，邊個講呀？我諗真係唔會，我完全拍唔慣呢啲咁樣嘅製作，聽講𠵱家TVB啲劇拍到日踩夜踩，咁又何必呀？唔諗喇，除非好意外喇，意外到畀1,000萬我咪拍。」
提到近日鬧得熱烘烘的免費電視發牌問題，馮淬帆亦說：「呢個同我冇關，我都唔知𠵱家香港嘅環境點，台灣同內地所謂嘅電視劇，都係用電影嘅方法去拍，但係香港都仲係冇變過，仲係要入廠錄影。」言談間發現馮淬帆心目中最希望做的，依然是拍電影：「要有人投資先得，一直有諗劇本，但係未講得，要諗個過到自己又過到人嘅劇本。我好鍾意拍啲所謂高深同有深度嘅戲，但係又要好商業。」
