【本報訊】盛傳獲委任為新一屆全國政協常委的前政務司司長唐英年，昨晚與唐營中人打邊爐敍舊，笑容滿臉的他不肯確認「喜訊」；對於劉夢熊指控特首梁振英的言論，他似有暗示：「我都識咗劉夢熊好多年，呼籲佢既然有咁嘅指控，應該有證據，可信度會增加。」
籲劉夢熊勿自殘
唐唐一家昨晚與友人在灣仔道餐廳「美味廚」筵開四席，自備逾20支紅酒和白酒，價值由數百元至數千元不等。頭號「唐粉」劉鳴煒和曾任唐營競選辦秘書長的何鑄明一早到場，心情大好的唐則於近7時現身。對於獲中央委任，唐唐笑笑口說「未有宣佈」，只說落選後不時思考如何服務市民和國家，又強調飯局非為慶祝。
對於近日大爆料的劉夢熊落選，唐英年笑說：「我唔評論其他人，但何柱國都話啦，劉夢熊做唔到政協，叫佢問吓董建華嘛。」至於劉夢熊聲稱願為爆料賭命跳國金，他則說：「我鼓勵佢珍惜自己身體，唔好咁殘害自己。」
一向識飲識食的唐唐，對小店似乎情有獨鍾，美味廚連續兩年獲推介為米芝蓮美食，以創意火鍋湯底聞名，如梳乎厘蟹皇蕃茄忌廉湯等，酷愛打邊爐的郭富城和霍啟剛等名人也曾是座上客。