和沙膽老總前後只見過兩次面，一個月講不到一次電話，對上一次通話，是要求老總開多一個周末欄專門解答讀者來函，〈周末醒Son〉順應而生。知老總事務繁忙，平常不敢隨便打擾，但最近在〈職場慧眼〉寫了篇文和老總抬槓，我是「慣犯」，本來冇驚過，但見讀者紛紛留言讚我夠薑之餘更替我擔心，禁不住膽顫心慌起來。絕對認真，我極度非常緊張又熱愛《蘋果》份工！反正對上一次和老總通電已是半年前的事，決定的起心肝扮無知打畀老總寒寒暄，探探口氣先。
老總例牌自己接電話，我笑晒口講句不好意思寫了篇文冒犯了，被即時踢爆「唓！你都出咗啦𠵱家先嚟講？」知我根本唔真心，冇癮！之不過他補多句「做得唔啱俾人鬧好應該吖，人哋犯錯我哋插得不遺餘力，我哋犯錯抵俾人插，冇理由更加冇得嬲！」當堂放下心頭大石。以為冇事，點知失驚無神整多句「又話叫我開星期六畀你答讀者，結果都唔係嗰回事！」原來老總有睇我個欄嘅！我馬上抗辯，之所以寫人生大道理乃係順應讀者所求，老總叫我唔使咁緊張，個欄係我嘅鍾意點寫我話事。最後老總話歡迎我有空到堆填區參觀探訪，他請我到飯堂食飯。壹傳媒有個高層先去得嘅飯堂，聽聞飯菜好得，唔知老總講嘅是否這間？團年可能太急趕，如果有機會同編輯哥哥姐姐一齊食餐開年飯就太好喇！
三言兩語 獲益良多
雖然老總話不多，他能夠三言兩語點出問題所在，提出意見方向好讓我參考再改善改進，我每每獲益良多。不要笑我面皮厚自己讚自己，我轉數的確快而且舉一反三，老總一點我就明。老總教人的功力，沒有幾多人有；即使有，都未必肯出手教；吸收能力像我般高的坊間一樣少有，怪不得惺惺相惜！
講開又講，越來越多讀者慕名而來說想我提點指教，證明我的專欄越來越受歡迎，當然是好事。不過我肯教又能教的，寥寥可數！三心兩意不知何去何從，這個不喜歡那個唔鍾意於是寫來請我指點迷津，這種問題應該要去問蘇師傅，或者可能有多少頭緒，我自問冇本事更加冇時間幫忙。
那些完全冇禮貌冇頭冇尾拋來幾隻字的我當然不理，日日好似追數咁質問我點解唔答，我幾時講過所有來函我事必一定答先？這種態度這種人，值得我花心機捱眼瞓嗎？莫講有事相求要禮下於人，對長輩老行尊要恭敬謙遜，任何時候場合對住所有人都要識得尊重以禮相待，是做人和學習最基本守則和態度。
本周Son姐醒你：「學者有四失，教者必知之。人之學也，或失則多，或失則寡，或失則易，或失則止。此四者，心之莫同也。知其心，然後能救其失也，教也者，長善而救其失者也。」
Son姐
「Son姐」Alison張慧敏，以獵頭人身份縱橫職場幾十年，有智慧冇美貌有份量冇身材，人稱「魔鬼教練」！