買家印花稅（BSD）實施了三個多月，老樓估計淨稅收已將近1億元，連同3.2億額外印花稅（SSD）的稅收，特區政府未打擊到樓價庫房卻袋袋平安，究竟點解在樓價高企及重稅下依然有買家落叠呢，好簡單，內地同胞同樣有置業需求。
呢一輪內地雙非學童搶北區學位搞到滿城風雨，教育局局長吳克儉冇晒辦法，叫家長去其他區選學校機會較高；而現任運輸及房屋局局長張炳良仲講風涼話，自己喜歡擔任教育局局長，若果上任碰上國教事件都未必識得處理。
重稅仍買樓 必有原因
張局長，你估運輸及房屋局局長好易做呀，同時面對200萬戶公私樓業主的資產，又要照顧20萬戶公屋輪候冊和數以萬計想上車的年輕人，今日唔爆鑊，難度你以為可以過骨，你太天真及幼稚了，若果處理得唔好，到時爆鑊甘。
呢班內地客或以公司客身份，都願意付出樓價15%BSD稅，證明了他們的入市態度相當肯定。
（1）中港兩地經貿融合，內地錢要走出去，當中扣除洗黑錢部份不是需求外，大部份為經常來港經商或安排子女入學，內地人鍾意買樓，而且喜歡買樓多過租樓，目前人仔升值，八算買港樓，當扣除買家印花稅都淨賺樓價5%，仲有得升值，長遠有得計數。
（2）內地收緊買樓，但其他投資欠安全，買港樓勝在簡單及安全，租售皆可，自由度高，縱使要全數支付樓價，咪當做定期，三年後賺了樓價差價和滙水，相當值，合乎投資之道——低風險高回報。
（3）住酒店貴不特止還通處走，欠一個固定居所。況且目前酒店房價有升冇跌，單住房日租1000至2000元，嚟香港半個月都要至少1.5萬元，不如買層樓在直通巴士站樓上，同住酒店冇乜分別。
財政司司長曾俊華和張炳良聲稱若樓價波動，會毫不猶豫出招壓抑樓價。出招會有用咩，只擔心換來的結果是盤源更少、樓價更癲。
劉兆昌
資深地產傳媒人
http://www.HKLau.com