「設計及文化研究工作室」的趙廣超這樣形容僅只百米的太平山街：「這裏就像電腦上的『開始』按鈕，生與死，開機和關機都在同一個地方。」走下觀音堂的長石梯，有座朱紅色的石造古廟，這裏是太平山歷史的開始，也是山上居民生命終結之地。
記者：陳慧敏 攝影：伍慶泉、陳慧敏，部份圖片由東華三院提供。
自由安放神主牌
回溯香港歷史，那是英軍登陸後的第三年，即1843年，英國把太平山區劃為華人區域。當年有好多華人單身來港打工，做揼石仔等勞動工作，最後客死異鄉，至1856年咸豐年間，「廣福義祠」成立，用來安放異鄉人的遺體及神主牌。那年頭，義祠也兼作醫館，幫不肯看西醫的華人診症，初來港無處容身的人又跑來寄宿與吃飯，漸漸地，這裏變成各色人等的棲留所，食客、病人、無人認領的屍體、病重者都來這裏等死，弄得義祠烏煙瘴氣。1869年，英文報章《西報》以「人間地獄」報道實況，逼港英政府整頓，於是就選了一街之隔的墳墓街，掘起山裏骸骨，建成第一所中醫病院東華醫院。
當年，百姓可自由把祖先的神主牌安放在義祠裏供奉，裏面連「可愛白貓」的神主牌都有，所以市民又稱此廟為「百姓廟」，老街坊話當年：「後來啲後人經常私自調動神主牌位置，有後人見自己先人嘅神主牌被移位，嘈嘈閉又自己調番晒啲位，1996年索性用玻璃封起晒啲神主牌，邊個都唔准郁，一天都光晒。」九十年代初，因灣仔合和中心附近的濟公廟被迫遷，濟公像移放義祠之內，所以義祠也被人稱作「濟公廟」，由那時起負責打理義祠的招先生說：「近年好多人都無嚟拜祖先咯，失蹤咯，有啲人又移咗民，但你唔能夠把任何一個神主牌抽走，免得有人返嚟尋根，失望而回。」
捐虎門過契濟公
東華醫院落成前，廣福義祠像是個生與死的模糊空間，政府整頓以後，環境變得很乾淨，感覺陽氣也大盛起來，惟獨地藏菩薩側旁的小門後面，就清楚成了人鬼的分界。
小門後面是個大房間，昔日這裏是存放屍體與病人看病的地方，自東華醫院落成後，大房間獨剩神主牌，在太平山街出世的老街坊說：「平時除咗拜祖先嘅人，就無乜人會入呢間房，黑沉沉，氣氛好陰森恐怖。」直至八十年代初，本來在灣仔合和中心附近一條巷仔迪龍里的濟公廟，因土地被收購，輾轉搬到了隔鄰太平山街38號的「孖廟」，經營了大約十年又要清拆，濟公又再度被迫遷，後幾經討論，索性諸天神佛全搬到隔鄰的廣福義祠來。道家的濟公財神、太歲、綏靖伯、包公、月老、和合二仙等一齊進駐，與地藏菩薩共冶一爐，成了正宗的滿天神佛，但亦因此吸引了更多善信。
招先生拉開牆邊一道虎頭木門說：「嗰陣時好多人將小朋友過契畀濟公，覺得濟公可以將小朋友教得聽聽話話。過契完就會叫小朋友捐過呢道門，表示拜過老虎，虎虎生威就可以快高長大，我都唔知道有幾多年歷史咯。同二三十年前比，近一兩年多咗好多年輕人嚟參拜，主要係拜和合二仙同月老，又因為𠵱家女多男少，所以好多女仔專登跑嚟拜月老。仲有呀，或者因為電視宣傳得多，但凡新年呢度就更加人頭湧湧，人人湧嚟攝太歲。」原來拜神，都是有潮流的。
街坊熱情口述歷史
「磅巷關注組」召集人之一的Kitty在這裏長大，現於普慶坊設工房，靜靜地搞她的陶藝創作。
「呢頭生同死關係好密切，荷李活道、四方街仲有啲棺材舖同壽衣店，東華三院後面又有個殯儀廳，細個每次行過都好驚，」Kitty：「以前，我阿公喺摩羅街有間古董舖，我經常跑嚟球場玩。呢度係典型華人社區，山水仍然沿住水巷啲小溝流落嚟，東街同西街嗰邊啲屋仲同百年前一樣起得密密麻麻，走到太平山街石級同磅巷之間，已經聞到燒香味道。有趣嘅係，以前呢度淨係得小店、印刷店、車房，但自從十年前有『SIN SIN』一類嘅藝廊進駐，今日周圍都有本地藝術家開設嘅小店，你會睇到何謂歲月嘅沉澱。」
因為懷舊、因為潮店、因為磅巷電梯計劃、因為舊區保育，近年這老城區熱鬧起來。一星期內，我在附近多條街道來來回回走了幾次，有些街坊已經認得我：「仲未問完呀？」午膳途中，「科記茶餐廳」的夥計又指着遠處正在上樓梯的某老街坊向我說：「喂！你去問呀乜叔啦，佢喺度好耐㗎啦。」隔天與Kitty走過，又有街坊說：「係啦！你問Kitty就啱晒嘞。」一星期，這麼快就熟絡了？隨便訪問街坊，莫理真假，他們都好願意與你分享記憶中的老街故事，而且一講就是半小時一小時。在這裏，廟宇的身份更像街坊們打躉的聚腳地，這裏有它的性格，有歷史舊街區的感覺，但又很有活力，很有生命力。
廣福義祠
（2859 7500）
地址：上環太平山街40號