一代浪子鄭伊健終於修心養性，同蒙嘉慧東京完婚，fans都戥佢高興。不過就算結咗婚都要講㗎啦，因為當年伊健、邵美琪同梁詠琪（GiGi）三人上演嘅「奪麵雙琪」事件，實在太經典啦！
話說99年伊健拍《仲夏夜狂想曲》同GiGi撻着，但未同邵美琪宣佈分手，搞到外界對呢組三角戀仲係估估吓。嗰年10月4號，伊健慶祝32歲生日，約GiGi喺佢西貢寓所過二人世界，點知行蹤敗露，全港傳媒齊集佢屋企樓下，搞到呢對熱戀情侶幾咁尷尬，拿拿臨call齊唱片公司職員幫拖，林珊珊仲拎埋個生日蛋糕到場，扮開通宵生日派對。隔咗陣，GiGi就以勝利者嘅姿態行出嚟見記者，企定定任影唔嬲，三角關係終於明朗化，GiGi從此多咗個「好勝GiGi」嘅稱號。
點知一年之後，伊健靜雞雞同邵美琪喺西貢約會，唔知伊健係咪驚GiGi呷醋，聽聞驚到要「爬窗走後巷」㖭！不過，伊健最終都冇同雙琪一齊，而雙琪亦搵到各自嘅歸宿嘞。
撰文：阿Wow
