本報財經版報道，有打工仔憑4萬銀本錢，短短5個月喺股市賺到百幾萬，認真厲害，因為要食盡今次升浪絕對唔易，尤其去年11月，恒指喺21000至22000反覆上落，唔夠定力及holding power，最多只能贏粒糖。正如專欄作者青姐話齋，喺投資市場作戰，膽（量）（見）識缺一不可。
今日推介嘅鞍鋼（347），落注亦需要膽識。集團周三發盈警，預期去年全年蝕41.6億銀（人民幣．下同），主要受累需求不足及鋼價下跌，由於公司連蝕兩年，按例A股將被實施退市風險警示。不過，鞍鋼上季蝕9.9億元，較第三季收窄近兩成，營運情況明顯改善；上月鋼鐵業PMI大升6.3至55.3，重上擴張水平，加上內地鋼鐵龍頭寶鋼連環上調鋼材出廠價，反映行業產能過剩問題已解決，需求亦隨經濟回暖上升，曙光乍現。受盈警拖累，鞍鋼噚日插水半成，收報5.74元，戰友可候5.50至5.60元水平吸納，中線持有，一兩成升幅應無難度。
唐牛