有「抽水大王」之稱嘅永義國際（1218）大股東官永義，以後唔使諗計抽水，可以專心踢波了。事關佢一對仔女已經入晒公司，幫手打理日常業務，官永義可以抽多啲時間幫永義足球隊落場。
抽水大王位千金官可欣（Candy）早兩年入公司學嘢，最近連細佬官俊廷（Michael）亦幫埋手，Candy噚日第一次帶Michael亮相，講解公司業務發展。
佢哋話近期樓市暢旺，勝利道1號個盤賣剩七個單位，去貨近九成，今年就主力發展太子道西精品豪宅，同埋長沙灣永義廣場改建酒店項目。
26歲嘅Michael，外表幾嫩口，畢業後喺恒生（011）做過兩年，兩個月前喺永義返工。Candy笑笑口話，官生𠵱家除咗做大方向規劃，就經常去自己隊球隊度，落場踢波。睇嚟，官永義開始過半退休生活喎。