六四二十四，今年係89六四事件24周年紀念，支聯會已經密鑼緊鼓為連串活動作準備。上年搞過嘅六四紀念館日日逼爆，支聯會薪火相傳，今年由深水埗舊樓轉去城大再開館，長遠就梗係最想籌到足夠嘅錢買永久會址，唔使年年為搵開紀念館嘅地方頻撲。
爭800萬起永久會址
狼英當年出任城大校董會主席之後，唔少人覺得城大逐步赤化，所以支聯會今次可以殺入城大搞六四紀念館，公開擺放民主女神像，都令人幾意外。支聯會希望紀念館可以早到4月中開館，至少六四燭光集會前有近兩個月時間畀市民到訪。
據聞今次展館地方大過上年嘅深水埗舊樓，而城大位處九龍塘火車站，相信有助吸引內地人參觀。有支聯會中人話，年年搵地開館都唔係辦法，最好係有足夠嘅錢，喺工廈買個單位，做支聯會永久會址兼設六四紀念館，但佢哋確實唔夠錢，早前搵過經紀問價，一個單位閒閒地成千萬，佢哋計埋上年籌到嘅錢都只有約200幾萬，落定都唔夠。
為咗開源，支聯會年宵檔有新產品推出，名為《民主會戰勝歸來》嘅CD收錄多首六四歌曲，每隻100蚊；印有「愛國愛民、香港精神；平反六四、永不放棄」嘅六四紀念tee每件80蚊，有黑、白兩色，當然唔少得華叔嘅文集同揮春，市民不妨喺2月4號起去維園支聯會年宵檔幫襯吓啦。
mailto:[email protected]
支聯會年宵檔賣乜？
