都唔係第一次推介「佳」字系嘅信佳國際（912），呢隻業務穩健、產品冷門嘅工業股，喺大市冇亮點之下，升吓升吓話唔定會跑出。
其實舊年6月，晉佳覺得信佳唔算吸引，原因係當時市盈率6倍，有淨現金約1億元，但拍埋民行（1988）、信行（998）當時嘅市盈率分分鐘仲低，要炒高輪唔到信佳呢啲冷門股，實在諗唔到要留一注畀佢。
不過，𠵱家恒指升咗兩三成，基本因素正常啲嘅大路股，已經升到一去冇回頭，上述嘅民行，低位回升差唔多成倍。信佳始終係冷門股，即使基本因素良好，但升市冇資金炒佢絕不出奇，所以舊年6月下旬至今冇乜升過，比較之下，𠵱家佢就變得特別平。
信佳前幾年每隔一段時間就開發到一項新業務，往往成為新增長點，但近年就冇乜好有定位嘅新產品，所以盈利開始由增長改為靠穩，股價近兩年亦停滯不前。雖然信佳近年搵唔到新增長點，但寵物培訓器材、專業音響電子產品同互動教學產品都表現穩定，業績依然交到貨，高息一樣照派。
目標價2.7元
舊年經濟麻麻，信佳盤數都倒退但情況唔嚴重。截至舊年9月底，中期收入按年跌1.4%，稅前盈利跌1%至5220萬元；但啱啱呢期業績有891萬元嚟自增持附屬公司而產生嘅一次性收益，扣埋嘅話稅前盈利有4329萬元，按年跌17.8%，年度化市盈率約7.1倍，淨現金1億元，佔市值5.8億元約17%。
信佳最近變賣深圳廠房，搬去東莞，未來生產成本將下降。公司以1.38億元人民幣出售深圳地皮，但東莞買地以至建新廠只係用咗1.22億元人民幣，仲剩番1600萬元人民幣，搬廠房興建新生產線都唔減少現金水平，着數到無倫，現金流又長期保持正數，相信唔會減少派息，股息率可以維持8厘。
自從舊年12月起，信佳股價已經逐步回升，成交亦見增加，係好現象，博佢業績隨着經濟回升，以股息率6厘做目標價，睇2.70元。
晉佳
本欄逢周一、三及五刊出