一連兩日施政報告辯論，冇乜人再關心。人人去估政協名單，其實政協乃「真心膠」製作之政治花瓶，有幾馨香心中有數，人大都至少係瓷器花瓶，高檔小小。仲係林D9同曾蔭權兩大港英「餘孽」有智慧，婉拒了中央好意。
中央派個位畀兩人有幾難？係班親中人士先至如獲至寶。D9唔做膠花樽，可能另有高就，出任基本法委員會副主任，比政協有實際職務。
曾蔭權退一步海闊天空
至於曾蔭權，孭住ICAC case在身，明知貪小便宜係冇case，但就遲遲唔結案宣佈終止調查，背後有乜原因，明眼人都睇得出。究竟CY有冇指示ICAC不斷鑽挖，好似屋宇署以非正常調查手法對付唐英年一樣，北京心中有數。
曾蔭權經大半年閉門反思己過，今回終於變叻咗，以ICAC調查未完為由，推卻中央好意推薦出任政協副主席。因為如果佢做咗國家領導人，而ICAC又「非正常」地遲遲唔結案，挺梁反曾人士若在知識分子梁粉報不斷放風，話ICAC有case，吹都吹死佢，試問北京顏面何存。曾明顯是顧及北京感受，且有羞恥之心，何況今日退一步，日後反而有好處。佢呢一步亦反映出梁振英同被ICAC立案調查，態度輕佻之餘，兼且無羞恥心。
唐英年出任政協常委，即使僭建要負刑責，俾律政司起訴，都冇政協副主席比ICAC纏身咁難搞，至少常委唔屬於國家領導級別。
今次政協佈局，梁營人馬意外地全無優勢，見微知著，在北京眼中，廣交朋友、深交朋友比栽種梁粉更為重要，亦是當前急務。
兩會之後，北京對港政策便出台，現時至3月期間，無論再爆出更多更大醜聞，北京也唔會郁佢。
但往後如果真係林瑞麟頂替梁愛詩，則表示呢位俾CY革走之政務司，敗部復活之後，仲會代表中央處理政改普選工作，同舊部譚志源又再合作，你話CY有冇運行呢？佢仲要求神拜佛，希望中央唔好對曾蔭權工作另有安排，否則一個唔覺意，又多一個人騎在佢頭上，CY日日擔驚受怕，真係人都癲！
添馬男