鍾尚志教授在專欄中講起，40年前他到愛爾蘭念醫科前老爸給他的剪報，那文章指出香港家長最易犯的錯誤，是給得子女太多和太好。40年後的今日，情況非但未有任何改善，還要變本加厲，肯定教鍾教授大開眼界！
舊日「陪讀」陪太子讀書，時至今日一樣有！父母買定豪宅跑車傭人照顧還未夠，想到子女孤零零讀書淒酸寂寞，於心何忍？於是出埋學費包埋機票住宿零用，總之所有開支全包，包埋同學仔一齊過去陪讀！
人仔細細未識搵錢就學識包養，二世祖經已有雛型，前途當然無可限量！即使住宿舍，一樣大把搞作。床褥枕頭被鋪全部從新置過只是小兒科，廚具餐具都要另置私伙以資識別，浴室用品更加不在話下。信不信由你，為免水土不服，不只食水，連廁紙都帶埋過去；飯堂食物當然唔啱寶貝食，所以四圍試食安排定時送外賣。
機票之所以咁貴，要多得這班小姐少爺支撐大局，不論長假短假，只要有假就回港度假；呼朋喚友外出消遣任飲任食毋須考慮價錢，總之附屬卡埋單。讀書時期經已揮金如土，他朝畢業投入職場發覺日做夜做才搵得雞碎咁多，點夠用？除了吃喝玩樂飽食終日無所事事，可曾想過生命究竟有甚麼意義，人生有何目標夢想理想？
報上有中醫講解兒童傷風感冒的處理，沒有胃口進食很正常，最需要的是足夠休息飲夠水，身體需要時間慢慢復元，急不來。但父母們過份緊張擔心，藥未食完覺得病情未有好轉就轉醫生，又中又西亂晒龍，病情只會更反覆。他的結論是，要醫好細路的病，先要醫好他們父母！讀罷覺得好笑，想深一層，不但笑不出，只覺可悲，他們可是我們的未來！
張慧敏
http://www.facebook.com/HKcareerdoctor