祖籍山東嘅狼振英，自細要幫阿媽煮飯，佢喺個人網誌聲稱因此學識一啲入廚基本功，日前喺禮賓府宴請70幾位長者提早過新年時，就喺長者面前露兩手，特別為呢班來賓下廚，仲親自示範包家鄉餃子，而佢老婆狼太唐青儀就負責落鑊。
除咗狼氏伉儷，佢仲特別邀請咗香港狗會嘅狗狗明星出席，喺一班賓客面前大顯身手，做出高難度動作，據知成班公公婆婆都睇得好開心。
狼英話喎，上個月都請咗幾十位小朋友喺禮賓府見證聖誕樹亮燈儀式，仲一齊唱聖詩，早前亦借出大禮堂畀公益金辦籌款晚會。
八方建議下次不妨喺禮賓府放部測謊機，搞全城測謊同樂日，肯定會成為香港一大盛事呀。