巴洛迪利告別英超回歸意甲，喺星期三返去米蘭即刻成為風頭躉。巴神接受體測之後同一班AC米蘭高層共晉晚餐，點知有過千名A米球迷嚟到一睹佢嘅風采，場面萬人空巷仲有煙花放，搞到巴神鬼咁開心。
曼城將巴洛迪利賣畀AC米蘭，基本上已經傾掂晒數。巴神喺周三飛去米蘭，先喺晏晝接受體測，之後就同球會副主席加利安尼同埋幾位AC高層一齊晚餐。巴洛迪利到埗，準備接受體測之前話：「可以加盟AC米蘭係我好耐之前已經有嘅心願，當我知道有呢個機會嘅時候，二話不說梗係仆倒去啦。今季我喺曼城唔係好順利，希望嚟到AC米蘭可以轉運。」
「榮幸助曼城捧英超」
巴神亦都有提到前度球會曼城同埋佢契爺文仙尼：「我肯定會好懷念一班以前嘅戰友，領隊同埋球迷，曼城會一直喺我心中佔重要位置。多謝大家一直以嚟嘅支持，或者他朝有日我哋會喺球場上再會。我愛文仙尼，佢係我職業生涯中最重要嘅人，多謝佢一直對我嘅信任。」AC喺周四宣佈交易已正式搞掂，巴神簽約加盟到2017年。
巴神喺周三晚戴住頂橙色喼帽現身餐廳，在場已經有至少1,000名球迷喺到等佢，一見到巴神就將佢重重包圍。班球迷帶埋歡迎橫額嚟又跳又叫，有啲仲離譜到放埋煙花。對於喺自己屋企都夠膽放煙花嘅巴神嚟講，班「粉絲」嘅行為簡直係濕濕碎。
不過球迷越玩越過火，最後要當地警方出動鎮壓，有球迷借機搞事掟樽，警察要出埋催淚彈先搞得掂，仲拉咗過百個搞事球迷。其中一位警察喺事件中受傷要送院治理，好在冇乜大礙。可能係因為近年意甲積弱，尤其係AC米蘭，啲球星好似有出冇入咁，難怪班球迷對於巴洛迪利回歸米蘭感到咁興奮。
球衣冧巴用番45號
有啲急不及待嘅球迷，當知道巴洛迪利轉會之後，就盪定件巴神9號波衫應吓景，但佢哋就肯定捉晒蟲喇。因為就算原本9號嘅主人柏圖已經離隊；但根據意甲規例，任何有球員用過嘅冧巴都唔會喺同一季內畀第二個球員再用，所以喺意大利國家隊着9號嘅巴神，肯定唔可以用番呢個冧巴，繼續用番45號機會最大。