【本報訊】香港樓價飛升，地產商貨如輪轉固然能夠大賺，但原來「囤樓」可以賺得更多。「囤樓王」恒隆地產（101）董事長陳啟宗表示，會在適當時間賣手上約1,400個貨尾單位，強調不是「囤樓」，只是「賣唔出」。有分析員估計，該批貨尾市值已升至逾200億，足足是集團去年核心盈利3.3倍。
記者：陳健文 陳新政
早前恒隆被「踢爆」囤積近1,400個貨尾單位，更被外界指是推高樓價的「幫兇」之一，陳啟宗昨日在業績會上強烈否認。他說︰「我哋啲貨尾並唔係上車盤，全部都係位置好同有海景嘅靚單位，價錢一啲都唔平。」截至2012年9月，市場上約有4,000 個一手樓空置單位，即恒隆「佔有率」達35%。
推盤褪軚 賴歐債BSD
兩年前曾多次以「皇帝女唔憂嫁」來形容旗下樓盤的陳啟宗，昨日卻「以今日的我打倒昨日的我」，指集團是因市況不佳而「被迫囤樓」，自爆去年下半年起幾乎沒出售過住宅。他說︰「有人話我加快推貨尾，但實情係減慢咗，舊年5月本來諗住賣400間，但因為歐債危機整冧個股市，最終賣百幾間，到10月嘅時候本來又想賣400間，連售樓書都印好晒，點知姓梁嗰位先生（特首梁振英）搞個BSD出嚟，打亂晒個部署，結果冇賣到。」
無論是「囤樓」抑或是「賣唔出」，結果是令到恒隆有機會賺得更多。陳啟宗表示，與去年5月比較，該批單位的售價已按年上升了15%，保養成本則好低。有外資分析員估計，恒隆手持貨尾現時估值已超過200億元，賬面盈利足足是去年全年基本盈利的3.3倍。
分析員：唔建議買恒隆
恒隆目前所持約1,400個貨尾單位中，以大角嘴浪澄灣持貨最多，達1,100間，現時呎價已過萬，較07年開售時的7,000元升值超過四成，持貨約250個單位的九龍站君臨天下，呎價亦高達1.7萬至4.2萬不等。有分析員說︰「𠵱家市咁旺，佢啲樓咁低成本，簡直就係暴利啦……現時呎價每升1,000蚊，恒隆貨尾幾乎就淨賺多1,000蚊，不過咁，由於恒隆唔係採取貨如輪轉嘅賣樓策略，佢冇其他地產商咁受惠樓價上升，我唔建議呢個價買恒隆。」
恒隆去年因出售非核心物業錄得純利約21.48億，令基本純利大增98.27%至61.78億元，優於預期，每股基本盈利升97.14%至1.38元，末期息57仙。內地租金收入首次超越香港，按年升18.49%至30.82億元，香港租金收入升3.36%至30.16億。恒隆集團（010）去年基本純利升83.42%至35.64億，每股基本盈利2.64元，末期息增派57.89%至60仙。