劉夢熊爆料之後，有關人士或有心人士，不知何許人也，立即向傳媒放風，劉夢熊早在一月八日已被廉記拘捕，進行調查，之後一連兩三日，電台烽煙節目收到不少聽眾電話，表達一類意見，就係劉夢熊既已被廉署拘捕，即係身有屎，此人不可信，在這個時候抹黑梁特首，顯然係懷恨在心，動機可疑。
跟住，又有報紙刊出梁特首向中聯辦推薦劉夢熊為政協常委嘅信件，繼而爆料話劉夢熊想拉王光亞落水，求佢干預香港廉記調查。
整套應對方案，只有一個主題，就係極速抹黑劉夢熊，令佢失去可信性，此人爆料其實係因求職不遂，亂發噏風。至於梁特首駛唔駛回應指控（即三證人不存在，與泛民係敵我矛盾，競選前曾應允劉夢熊若干職位），就以廉署正在調查，不便評論作為推搪之辭。
一位在財經界打滾多年，與劉夢熊老早認識嘅經紀對我地講：「呢單嘢令兩個人都貶值晒，不過劉生從來冇乜價值可貶，梁生就慘啲！」劉生在財經界有甚麼聲譽，大家心知肚明，不用多講，但一件還一件，我地唔能夠因此而以為劉夢熊完全不可信，真相要有待調查。
睇荷李活電影都睇得多啦，好似朱迪科士打做過一套戲，演被人強姦嘅女角，辯方律師搏命搜集資料指朱迪科士打平時濫交、吸毒、交友不良，係壞人嚟嘅，目的就係希望陪審團不相信女主角之言，判嫌疑強姦犯無罪。
邏輯上嚟講，一個監犯，壞人講嘅嘢，未必一定係謊言，濫交女性當然亦有可能被強姦，有好多香港聽眾不識此邏輯，打電話去電台鬧主持人、鬧劉夢熊，認為梁振英毋須公開「三位專業人士」姓名，就證明香港部份民智未開，令人心痛。劉夢熊與梁振英之「政協常委」交易究竟有無，佢兩人先至知得清楚，而梁確實係寫信去中聯辦推薦咗劉夢熊，讚佢旗幟鮮明有戰鬥力。以前有法庭新聞指一位商界名人在西環中聯辦門口交現款俾一位人士，以為咁樣就可以做政協，誰知遇上假扮中聯辦人員嘅騙子！若非有人相信政協（買官）之說，名人邊會咁易上當呀！