港交所（388）高層好鍾意約食飯軟銷新政策，前幾年推加時，CEO李小加不時約七個券商組織食飯做游說工作，最近爭取3月推期指夜市，就出到「鵝髀打人牙骹軟」，噚日喺中環鏞記宴請五個券商組織代表，加埋立法會議會張華峰，可惜呢餐只係「雞同鵝講」。
有份赴宴嘅人士投訴，港交所呢次誠意唔多夠，前日先至臨時臨急約佢哋食飯，好似佢哋冇人約，一定可以應約咁。又由於李小加同一時間去咗將軍澳為數據中心開幕，所以只係由負責股票、期貨產品嘅高層戴志堅出面游說，降晒呢。
最重要係，戴志堅同大家講咗兩粒鐘，只係不斷為夜期護航，似乎冇心聽取業界意見，結果變成你有你講，佢有佢講，大纜都扯唔埋。睇來夜期可能好似加時咁，港交所話推就推，冇轉彎餘地了。