地球真的很危險。教車師傅馬偉雄，之前疑因發起工會，俾香港駕駛學院炒魷，之後絕食抗議。星期一行動結束，星期二練跑準備馬拉松時，非常唔好彩遇到粗心大意嘅司機，右腳掌被撞斷。
搞工運，搞到飯碗不保；又巧合地呢個時候出意外，馬偉雄真係可算係禍不單行。不過呢次工運，先令大家知學院對員工有幾刻薄。香港駕駛學院有七成股權，係由「重慶李嘉誠」張松橋旗下嘅港通控股（032）持有。睇番舊年上半年業績，雖然學院收入按年只係增加9%至約1億元，但稅前賺成3393萬元，按年暴增近七成！不過原來一個年資20年教車師傅，月薪先至萬一蚊。
業績話「由於平均時收增加，訓練課程收入得以上升。在靈活成本結構下，邊際利潤亦有所改善。」到底具體係用乜嘢方法提升margin就不得而知啦，但最少肯定其中一個手段係靠剝削員工。馬偉雄出意外後，學院先突然話願意請返佢，萬事有商量。係就係示意讓步，但學院涼薄形象相信好難洗底。
Fifi
本欄逢周二、四刊出