風水師傅楊天命月頭俾舊客放火燒寫字樓門口之後，都冇乜點亮相，唔知佢係咪算到龍年唔利佢，等到蛇年先再出動。聽聞佢應承咗領匯（823）大年初十（2月19號），喺愛民邨商場開年，同街坊講解風水運程，醒大家蛇年開運貼士。
領匯每年都會揀一個商場開年，今年輪到愛民邨。領匯公關講，除咗楊天命同CEO王國龍，佢哋仲諗住請其他明星做嘉賓，同街坊拜年。
不過，街坊肯定最想見到楊師傅，佢算到自己邊日有火劫，準備定九桶水同一支滅火筒及時撲火，咁堅，到時一定要問佢蛇年運程，如果佢算到邊隻股今年大升就最能惠及廣大股民嘞。