業主狂加舖租，除咗趕走茶餐廳、街坊老店，就連錢最多嘅銀行都要避走，走去開樓上舖。星展最新一間豐盛理財中心，噚日就喺尖沙嘴彩星集團大廈15樓開幕，呢幢樓出名多食肆租客，如果冇通知，真係唔知有間理財中心喺度。
玩機艙feel
𠵱家去尖沙嘴最旺嗰幾條街行，一眼望埋去大部份都係金舖、名錶或者名牌手袋店，舖租閒閒地一百幾十萬一個月，銀行搵街舖開理財中心，肯定唔會隨便簽到一位肯畀低一百幾十萬做投資嘅客仔，淨係舖租都好難計得掂條數，轉上寫字樓既可以喺旺區有據點，租金又平好多，惟有係咁啦。
睇晒星展香港分行網絡嘅董事總理鍾少權承認，開間千呎分行，如果揀地舖，租金較寫字樓貴三至四倍。不過，佢都明白上樓始終冇地舖或者商場舖咁方便客仔，於是度橋，食住向高空發展呢個勢，將間分行裝修到好似飛機艙咁，職員掛喺心口嘅星展襟章又加咗對翼，增加機艙感。
查實證券行好多年前已經向高空發展，𠵱家除咗耀才（1428）同致富比較多地舖，凱基、時富呢類多散戶嘅證券行，分行全部喺晒寫字樓上面咁滯，舉例講，元朗滙豐大廈同上環新紀元廣場就有好多證券行租客，只係估唔到𠵱家連銀行都要被迫上寫字樓，寫字樓業主又有一批新嘅潛在租戶了。
李華華
mailto:[email protected]