年近歲晚，添置新傢俬係唔少人的指定動作，買張按摩椅送畀長輩，係唔錯的選擇之一，趁個市悶悶哋，不如介紹隻非一般地平的豪特保健（OTO，6880）畀大家。
先旨聲明，OTO目前仍處於「BB期」，要等到「長大成人」，公司講明起碼要2015年，現時收集要有長期作戰的準備。不過，要發掘倍升股，最好當然係「識於微時」，OTO現價0.69元，市值僅2.2億銀，平過隻殼，更持有現金2.1億，即每股0.66元；扣晒所有負債，每股淨現金仍達0.55元，佔市值八成，即現時業務只值4400萬元。
截至去年9月底止半年，公司賺483萬元，按年倒退62%；當下半年賺500萬元，扣除現金後的PE只係4.5倍，PB亦僅0.83倍，可謂禾稈冚珍珠。再睇業務，截至上月，本港設有12間專賣店及18個零售點，內地銷售點亦達55間。公司料3月底前，內地銷售點將不少於80個，主要位於一線城市，2015年目標為150間，意味未來兩年將踏入快速增長期，並食正內需及城鎮化的大趨勢，估值勢必回升至合理水平。
去年10月，公司配售2000萬份一年期認股證，行使價0.655元，炒上換股的誘因不低，中線目標1蚊，屆時仍較招股價低37%。
魏力