紐卡素為咗保住個英超席位，嗱嗱臨喺今個冬天搞場法國大革命，初步睇仲好似幾成功。前晚佢哋喺英超搶分大戰，靠法語系球員柏比斯施斯同埋卡比耶入波，贏阿士東維拉2:1兼攞到今季首場客場勝仗。維拉就大鑊嘞，近7場聯賽輸足5場，再咁落去，下季隨時要踢英冠。
紐記喺今個月簽咗5個法甲兵後，連埋本身嗰啲，陣中就有成14個法語系球員，當中有10個更係法國兵。喺前晚場來回6分波嘅護級大戰，領隊柏度雖然冇出晒啲法語球員，但正選名單上都有5個，包括迪保治、卡比耶、穆沙施素高、高法蘭同埋柏比斯施斯；連埋後備落場嘅恩加麥比華，總共有成6個，咪話唔誇張。不過紐記球迷似乎就好受落，喺場上揮動法國國旗支持吓。班法甲兵亦總算做到嘢，喺19分鐘就由穆沙施素高助攻畀柏比斯施斯先開紀錄；跟住喺31分鐘，再由卡比耶將比數改寫成2:0。
柏度將施素高捧上天
換邊後紐卡素俾維拉㩒住嚟打，好彩門將告魯爾有超水準演出，只係輸番一球12碼；最終佢哋都贏2:1，仲打開今季客場比賽嘅勝門。未計周三啲賽果，佢哋由第16位跳升一級上第15位，輸波嘅維拉則由第17位跌落尾3至第18位，護級前景越嚟越唔樂觀。柏度賽後賣花讚花香，大讚新兵穆沙施素高：「今晚我終於有覺好瞓嘞！如果我哋冇簽到施素高，我唔認為我哋贏到呢場波囉。佢呢個收購對我哋嚟講，真係好重要。」
維拉喺7日內連揩三嘢，上周中同周末分別喺英聯盃4強同英足盃第4圈出局，家陣再喺主場聯賽輸波，近7場聯賽就取得2和5負，真係勁頹；如果成績再冇改善，睇嚟林拔應該會人頭落地。呢日搶到分嘅下游球隊，仲有昆士柏流浪同埋韋根，後者作客史篤城喺落後0:2下，靠麥亞瑟同迪山度各入一粒而逼和2:2；攞到呢寶貴1分後，位置即刻同維拉對調。韋根領隊馬天尼斯話：「舒卓拿一返嚟就發揮到作用，我希望可以簽多一至兩個返嚟打護級戰。」
紐記、韋根同昆士柏流浪都增強兵力打護級戰，如果維拉喺轉會窗關閉前簽唔到一、兩件好嘢返嚟，睇怕都好難逃出生天囉！