美聯集團（1200）最近有個新電視廣告，只見高登女神陳嘉桓通街走，途經一輛印上美聯招牌嘅巴士，愛心爆棚嘅嘉桓BB，伸出援手協助兩母子上車，最後再來一個殺死人嘅招牌笑容。雖然「幫客上車」呢個概念只得幾秒鐘，但嘉桓BB嘅風采就成功吸引我呢啲宅男嘅眼球，美聯呢鋪都算揀啱代言人。
港股噚日再度發力，埋單升166點，令唔少認為個市玩托沽嘅股友大跌眼鏡。農曆新年臨近，酒店股例旺場，主打中價酒店嘅帝盛酒店（2266），噚日再創52周新高，值得望多兩眼。截至去年9月底止，帝盛中期賺5.5億銀，按年大增4.8倍，撇除特殊收益，實際盈利按年增長7.1%。帝盛最吸引之處在派息高，現價息率達6厘，啱晒食息一族，配合公司買工廈翻身變酒店政策，未來盈利可看高一線。帝盛噚日收報2.00元，升2%，成功突破去年12月高位，短炒先睇2.30元，潛在升幅15%，屆時息率都仲有5.2厘。
唐牛