【中環】早前因為藝人飯局事件，怕人身安全受到威脅嘅黃浩，專登請咗外籍保鑣跟出跟入，保障自己一家大細嘅安全，所以早排佢同老婆徐淑敏（Suki）去到邊，都見到一名黑人保鑣喺左近。以為件事淡忘咗一排，黃浩唔使再請人保護啦，點知唔係，原來佢仲有請保鑣幫手，真係小心駛得萬年船。
前日下晝3點左右，Suki上咗中環威靈頓街一間樓上嘅髮型店，搞咗個幾鐘之後，見到佢容光煥發咁落樓，點睇都唔似人哋媽咪。落咗樓之後佢就不停打電話，應該係搵司機嚟接，而一直喺樓下等佢嘅黑人保鑣，就喺冇幾遠嘅地方走過嚟同佢會合。
自己做生招牌
本來Suki個樣好似好悶咁，但佢個保鑣好識做，同佢有傾有講，𠱁到Suki好開心笑番晒。稍後當司機揸住架好搶眼嘅鮮黃色Hummer越野車駛到嚟之後，保鑣仲幫Suki開咗車頭度門畀佢上車，然後自己就坐後排，真係好識尊重老闆娘。
其實近排Suki少咗出嚟唔係因為俾人封殺，相反佢工作量依然好多，近排佢忙住為自家品牌嘅護膚品安排宣傳，所以自己出親嚟都扮到靚靚，實行自己做生招牌。
採訪、攝影：楊浩賢、梁繼光、陳辰
