【首爾直擊】胡杏兒同鍾嘉欣日前去咗韓國拍無綫節目《TVB新春黃金慶典》，噚日佢哋喺兩、三度氣溫下到光化門拍外景，仲同成班小朋友一齊整年糕，嘉欣仲發揮語言天份，以普通話及韓文同小朋友溝通。
苦練廚藝
第一次整年糕嘅嘉欣話好懷念喺溫哥華同家人過年，佢自爆媽咪投訴佢唔識煮嘢食，所以新年目標係煮好啲餸，又覺得識煮餸嘅女仔着數啲，至於伍允龍鍾唔鍾意，嘉欣話：「你哋問佢啦，我想做入得廳房、出得廚房（應為入得廚房出得廳堂）。」嘉欣仲講錯東大門為「大東門」，明洞為「明都」，笑爆全場。
杏兒拍完外景即趕返內地拍劇，問到此行有冇識韓仔？佢話：「都想，但行色匆匆冇機會。」佢知道嘉欣超迷韓星池城，好抵死咁整蠱佢，等嘉欣以為杏兒有機會同池城拍MV，恨死嘉欣，反而杏兒就鍾意玄彬同Rain兩位韓星。
撰文：馮仁昭