白鴿黨過往擺年宵，嚟嚟去去都係議員寫揮春，同埋借個檔口畀友好政團寄賣書呀、年貨呀，冇乜新橋咁。但自從成立咗創意媒體部之後，入面嘅白鴿仔時有新搞作，今年就首度自資設計年宵產品，亮點係「升官發財鬥快落台」魚蝦蟹，以大話英、哨牙仔、飯焦等政壇「紅人」代替魚、蝦、蟹登場，新年期間可以邊議政邊賭花生。一套盛惠38蚊，限量一千套，有買趁手喇。
仲有一件紅噹噹「輸都變贏」Tee，好意頭得嚟又諷刺民建聯哨牙仔輸咗選舉，竟然一個鯉魚翻身做副局。點解唔印埋劉副局嘜頭上去？民主黨副主席羅健熙話驚滯銷，血本無歸喎！