劉夢熊被CY嫌棄，早在選舉進入提名成功，CY穩坐釣魚船後，已嫌黑熊大口兼惹是非，刻意切割，當日開票梁營人人上台歡呼，黑熊不見人，之後才有「人在旅途灑淚時」之嘆。
呢種梁山泊三山聚義式嘅利益組合，互有計算，CY已夠票兼成功令中央棄唐，點會仲招惹有陣江湖味嘅黑熊，原本大家和平分手也好，呢張單CY多少都要找一部份，冇理由食霸王餐。黑熊自知對方嫌自己三尖八角，當日合謀做唐唐世界時，視黑熊為忠義之士，純屬策略。佢個班底除咗紅顏知己鄧淑德有深交外，羅范、張震遠及林鄭，冇一個有交情，全部都係利益組合，各有原因埋堆，講到尾就係利益。
漁農界有着數 紡織界眼紅
外國執政黨走埋一齊班友，當然亦有共同利益考慮，但絕對不能赤裸裸只有利益，而毫無共同信念可言。正因為政治之本質有醜惡部份，更加需要有一套價值信念，執政目標、核心綱領去做平衡。今日特區政治最惡頂嘅，係還原至赤裸裸嘅利益交換，而且公開地進行，不以為恥！
佔GDP極小嘅漁民都醒5億基金，難怪紡織及製衣界立法會代表鍾國斌眼紅，原因好簡單，漁農界是中聯辦鐵票部隊及CY之票倉。大家坐定定，今後將有唔少此類選舉埋單行為，董建華航運家族念念不忘十號貨櫃碼頭，董建成在施政報告發表前已公開表示十號碼頭無寸進，因為政府唔肯免地價。相信好快在經濟發展委員會航運小組上，就有人提出十號碼頭及物流園大計免地價，交私人建造營運，以協助香港維持航運中心地位。
金發局變利益勾結翻版
經發會、金發局就係八十年代日本通產省與經團連（Keidanren）利益勾結模式翻版，經團連係日本企業主要龍頭代表，有極大政治游說能力，主導日本產業政策，係日式官商勾結獨有形態。90年CY政治盟友鍾逸傑、羅康瑞等人組織工商專聯，就係想仿效經團連成為主導工商政策嘅超級游說團體。產業界別在經發會內游說官員，目的當然係要求政府提供政策傾斜，利益優惠，同當年董建華搞高科技製造業，引入漢鼎亞太來港生產晶圓，給予土地、稅務及外勞優惠，如出一轍。相比黑熊張wish list，呢班工商金融界梁粉們item多好多，要埋單，就惟有繞過財政司及財金系官員。
十年前全部發生過，十年後又再來一次，你話香港點會唔俾佢玩死。
添馬男