45歲的周發開（發記）自小跟隨父親，繼承祖父的漁船，自懂事開始便幫手撒網捕魚，捱過巨風駭浪，卻敵不過官字兩個口。政府禁止拖網捕魚而向漁戶派發津貼助轉型，但竟以發記的漁船殘舊為由拒發津貼，更質疑其身份，「話我唔係漁民，打魚打咗幾十年，咁我係乜嘢吖？」記者：趙琦
「1920年之前，阿爺已經開始做漁民，跟住我老竇做，到我係第三代，我除咗小學嗰陣上岸讀咗幾年書，10幾歲已返上船幫手，一路做到𠵱家」。發記深深不忿地表示，難以數清為香港魚市場貢獻多少魚穫，但卻被冤枉為偽漁民。
發記帶記者參觀其俗稱「蝦艇」的漁船，娓娓道來其漁業生涯，「細個嗰陣啲漁船仲未有發動機，要用風帆，出海好睇天氣，因為要靠風力行船」。他指着船艙的一張矮凳，坐下續說：「撈完魚穫上船，成堆魚會倒晒落地，我哋就坐喺度將啲魚蝦蟹分類，呢啲嘢我5、6歲嗰陣已經幫手做。」他最難忘1980年到長洲水域拖網時，捕獲一條長40呎的大白鯊；最驚險則數1994年，在大嶼山水域作業時，船尾遭貨船攔腰撞斷起火，險些喪命。
批評審查標準不一
發記拿起魚網及繩索，怒氣沖沖指，「漁護署啲人行上船，求其望兩眼，然後就話我啲嘢殘殘舊舊，用唔到嚟作業，佢哋嚟之前兩日我都仲用緊吖，就係日日用先會舊啫」。
發記慨嘆，政府禁止拖網捕魚，已被迫停工兩個多月，與其大小、設備一樣的漁船均獲發數十至數百萬元津貼，用以改裝設備轉型到外海捕魚。他批評署方審查標準不一，兩度拒絕其索償申請。他訴苦稱，「一家五口靠我養，𠵱家用儲蓄度日，唔知捱到幾時」。
靠對講機識老婆靚聲定情緣
做漁民最緊要聲甜！點解？發記指着駕駛艙內的對講機笑說：「我就係靠部對講機識老婆，聽把聲幾好聽就撩佢傾偈。」手提電話尚未普及前，漁民終日埋首船上工作，唯一識朋友的途徑便是透過對講機搭通天地線，以靚聲定情緣。
對講機功能儼如現今時興的社交軟件「微信」，只要開機便能搜出「附近的人」，駁通頻道便可加入對話。發記指，對講機頻道多逾七條，每晚有數十人在不同頻道聊天，好不熱鬧，「如果覺得啱傾咪搭嗲，一晚最多可以同十幾個女仔吹水，傾完一個接一個」。
茫茫聲海，發記終找到知音，傾足三年才約太太上岸相見，一見傾心譜出愛曲。發記指其八兄弟姐妹中，便有三個藉對講機結鴦盟，每晚最大娛樂是圍着對講機聽八卦事，至90年代後，對講機才被手機取代。
