西貢區議員「哪吒」方國珊（圖），佢嘅總幹事崔定邦（小圖）前排跳槽去自由黨田北俊議員辦事處，原來呢樁小事，激到哪吒喊咁滯。方國珊噚日主動同傳媒訴苦，投訴自由黨出動銀彈攻勢，仲話周梁主動帶頭、聯同田少親自出面撬走阿邦，結果呢位助手月中粒聲唔出，留底鎖匙同電話就走人。
向來買地唔買樓嘅田少笑笑口話，呢啲小事點會由佢同周太去面試呢？至於銀彈攻勢嘞喎，反問：「出番同一個人工係咪銀彈？」阿邦回應，去年11月已經遞信，經挽留後今個月先走，離開因為立法會選舉後哪吒作風有變，未能合作。職場無真愛、有奶便是娘，八方覺得哪吒都要睇開啲，快啲搵番個得力左右手仲實際。