衞冕嘅熱火周日雖然兩度加時下，以98:100輸咗畀塞爾特人，不過都影響唔到佢哋周一以去季總冠軍身份，到白宮見美國總統奧巴馬嘅興奮心情。一班巨星去到總統屋企，即時變咗班大細路，勒邦占士致詞仲話：「阿媽，我得咗啦！」
奧巴馬邀功兼挑機
一班熱火兵到咗華盛頓都好精神，「大帝」勒邦占士入到白宮仲成個大細路咁；又同3分射手米克米拿喺白宮圖書館扮傾國家大事，又同凱斯林喺會客室嗰講台度扮晒同記者宣佈重要事務咁。帶埋女友Gabrielle Union嘅獲迪，仲喺甘迺迪總統幅油畫前影相，姿勢亦都抄到十足。
主菜梗係見奧巴馬，同接受佢嘅祝賀。比起上年見2011年總冠軍小馬，總統今次語氣輕鬆得多，仲不時搞笑。佢講笑話熱火可以以場數4:1擊敗雷霆，都係多得佢：「今日有啲隊員係第一次到白宮，不過有幾位喺幾年前我生日嗰陣嚟過，仲一齊打過波。我唔係邀功，而係佢哋同我打波，就係為打贏杜蘭特同韋斯卜克而做好準備。今日佢哋再嚟，無非都係要同我再分高下。」連任成功嘅奧巴馬勁讚熱火喺2011年同總冠軍擦身而過之後，自強不息咁面對批評，冇氣餒之餘，仲更加畀心機打波。
「大帝」同獲迪亦代表球隊，送波衫同簽名籃球畀奧巴馬；前者好興奮咁講：「可以去到白宮，感覺就好似『阿媽，我得咗啦！』一樣。」熱火見完總統，周三會作客網隊，繼續衞冕之旅。（now635台周四9:00am直播）