維園年宵檔即將開幕，為議席爭崩頭嘅各大政黨，喺維園一樣大鬥法，個個爭住搶年宵客「荷包」。公民黨今年除咗繼續以余若薇墨寶做鎮檔之寶，仲大賣「人人落力~~~踩CY」人字拖，48蚊仲包埋過期《陽光時務週刊》，同場亦有「誠實豆沙包」耳筒繞線器，每款18蚊。
民主黨都唔敢輕敵，年宵檔除咗有T恤同快勞等雜貨，聲稱仲有一樣歷年未推出過嘅產品喎；八方問係咪卿姐兇人年曆？有人笑笑口話卿姐係非賣品，嚴禁出售，遲啲先揭盅，𠵱家賣住關子先。民建聯就希望以自嘲式「蛇齋餅糭」福袋殺出新血路，據聞開幕日請咗3位局長撐場；八方好奇怪，點解唔搵狼英到賀呀？