「萬人迷」碧咸加盟阿仙奴？唔係，只不過係佢想keep fit同證明自己仍然可以喺最高水平聯賽競逐，由周二開始同兵工廠跟操啫。不過，其實37歲嘅碧咸吸金力依舊超強，加上又係自由身，所以就算轉會窗喺1月尾關閉咗，佢都可以隨時加盟任何球隊；睇嚟，佢真係皇帝女唔憂嫁。
雲格：唔會加盟
碧咸喺去年12月離開美職聯總冠軍洛杉磯銀河後，話想尋求新挑戰；但係，雖然傳出佢可能加盟多支球隊如巴黎聖日耳門、摩納哥、昆士柏流浪、韋斯咸，甚至係中東、澳職同中超球隊等，但佢一直冇落實新動向。
喺周二，佢就去咗阿仙奴嘅訓練場跟操，兵工廠領隊雲格喺對利物浦嘅賽前記者會度話：「係碧咸打電話畀我，佢問我可唔可以嚟跟操，以保持狀態；因為佢已經好耐冇操咁話喎。佢今次真係純粹跟操，唔需要揣測佢會唔會加盟。」其實今次已經係碧咸第2次跟阿仙奴操練，佢喺08年時亦曾經咁做，而兩年前喺美職聯休季期間，就試過去另一支倫敦球會熱刺跟操，藉此保持狀態。
自由身慢慢揀落班
不過，如果大家見到碧咸周一喺西班牙馬爾貝拉（Marbella）拍新一輯adidas廣告，就會睇到佢身形都不知幾咁fit，同埋跑嚟跑去都面不紅、氣不喘。加上喺周二操練時，着住對粉紅波boot嘅碧咸完全跟到大隊，而兵工廠其他球員好似普多斯基同韋舒亞，都變晒小球迷要合照，就知佢有幾勁啦！
據我求大俠估計，碧咸吸金力特強，喺2011年商業贊助就為佢帶嚟1,330萬鎊（約1.66億港元）嘅收入，而佢同adidas所簽嘅終身合約，據報總值更高達1.61億美元（約12.5億港元）；加上又係自由身，喺轉會窗關閉咗之後，都可以加盟球會，所以真係慢慢揀，揀啱先加盟，然後繼續打其風流工。
另外，阿仙奴公佈今夏將會去印尼季前集訓，仲會喺7月14日友賽印尼國家隊㖭！