農曆年將至，好多人已積極買年貨，秘書Ｖ陪家人到九龍城街市一帶，只見人頭湧湧，再與朋友到德輔道西（海味街），又係摩肩接踵，話香港人冇錢，幾難令人相信，大概香港藏富於民，市民購買力極高，今個農曆年會十分興旺。海味價錢就貴晒嘞，花膠價尤其上漲不少，秘書Ｖ見到一件花膠與佢去年買嗰件大細厚度差唔多，問吓價錢，足足漲咗一倍有多，嘆一聲：「仲點食得起！」點知店員回答：「小姐，手快有，手慢冇，靚花膠好快就賣晒！」秘書Ｖ問：「係唔係強國人掃貨？」售貨員話：「呢度好多本地顧客至真！」花膠買唔起，聽聞環保團體強烈反對食翅，香格里拉與半島酒店不賣翅，魚翅係唔係滯銷，會平啲呢？秘書Ｖ試吓問翅價，唉吔，又係升咗，售貨員話：「你唔好信咁多報紙講嘢，記者有偏見嘅啫。實情呢輪魚翅好好賣，一位熟客話趁住有啲人抵制魚翅，佢可以食多啲，買多啲！」
咦！行到攰，醒起一張報紙食經介紹上環有間酒店內嘅泰國餐廳有泰式煲仔翅，好正斗咁話，於是秘書Ｖ與朋友行路去間酒店食翅，點知一吃便不是味兒，翅比較少，報紙食經似乎言過其實噃。
睇報紙食經，都係《爽報》啲專欄夠爽，唯靈、肥佬韜、馮美基、方曉嵐，位位都係食神。阿May Fung除咗專賣曲奇餅之外，還有新搞作，趁新年出埋年糕，打電話嚟喝令左丁山快快試食佢啲年糕──牛肝菌原味蘿蔔糕，食過又真係幾正斗嘅，May姐話此糕採用揀手白蘿蔔、雲南野生牛肝菌、一級乾瑤柱、蝦米、風乾臘味等材料，採用May姐秘而不宣嘅獨家做法，蘿蔔糕食到不少蘿蔔幼絲，咬落去好爽。May姐同時推出燒鴨蘿蔔糕、極級原隻鮑魚蘿蔔糕、甘蔗馬蹄糕、桂花年糕、斑蘭椰汁年糕等等，自1月22日起推出市場，一路賣到年廿九（二月九日）。啲名氣女士幾有廚房天份，唔止阿May一位，不少名太紛紛出版食譜，退休議員梁劉柔芬出版咗一本嬰兒食譜，方曉嵐新作有《巧手精工順德菜》，秘書Ｖ睇到愛不釋手，話趁新年照辦煮碗喎！