狂掃689票當選特首嘅梁振英，為咗制止「食碗面、反碗底」嘅灰熊晉身尊貴嘅全國政協常委同行政會議，寧願犧牲誠信都要反口，高尚情操贏得「愛港之聲」成員力撐，噚日喺政總掛起一張張心意卡，為振英同志打氣。
呢個咁溫馨悲壯嘅場面，不期然令人諗起乜嘢天災人禍。通常係發生咗一啲死傷無數嘅大災難，或者某某全城關注嘅人物病危命懸一線，先會有人號召製作心意卡，幫垂危嘅生命鬥士起死回生。然則「愛港之聲」係唔係見到振英同志民望屢創新低，政治生命岌岌可危，所以發動呢場送暖運動？
吳爽都有好多朋友話受到「愛港之聲」嘅感動，想借門常開一用，幫振英同志加油喎！
