李寧（2331）最近忙於「通渠」同抽水，認真唔得閒，但幾唔得閒，都要睇實之前大灑金錢搞嘅贊助活動有冇成效。據聞部份中國職業籃球聯賽（CBA）球員因為唔肯着李寧贊助嘅波鞋，累到所屬球隊被罰錢。
舊年市傳李寧以天價20億人仔，從安踏（2020）手上搶咗CBA五年贊助權，姚明同易建聯都係打CBA出身，知名度無需質疑，攞來贊助應該收宣傳之效。
但近期爆出，有CBA球員唔肯着李寧波鞋，原因係佢哋日積月累嘅傷患令到腳形變晒，怕着李寧新鞋會易整親舊患，着舊波鞋穩陣啲。
聽到呢個解釋，李寧一方面派人幫球員再度身訂做波鞋，但另邊廂依然揸正來做，12位球員所屬嘅隊伍，要為球員畀罰款，位位最少罰兩萬人仔。咁都啱，畀錢贊助反而見到其他牌子嘅波鞋出現，唔嬲就假！