賭王何鴻燊三太陳婉珍一向有投資物業，唔只齋買賣現成物業，仲會重新起過嚟出租。三太06年就用6000萬買入石澳山仔4號屋，08年獲批起四幢三層高獨立屋，轉眼間已經落成放緊租，聽聞最近開齋，以20萬月租將一間屋仔租畀個外籍律師。
石澳區豪宅主要分佈喺石澳道同石澳山仔，前者住咗多位城中富豪，包括信置（083）主席黃志祥、九倉（004）主席吳光正，限制較多；石澳山仔就比較易入場。租住三太喺山仔路4號嘅四間屋仔，勉強都可以話與城中富豪為鄰，起碼都係望住同一個無敵海景。
三太今次以月租20萬租出一間屋仔，假設另外三間同樣20萬月租，夾埋收到80萬，一年收益率高達16%，都話做包租公、包租婆最好啦。